专家拆局：车仔水晶宫大激斗

青春风暴 Vs 遇强愈强

周六英超头场上演伦敦打吡，车路士主场斗水晶宫。车仔青春风暴席捲英超，多波入、进攻有活力已经成为蓝战士最新招牌，不过遇强愈强水晶宫都唔可以睇少，佢哋不嬲唔介意同Big 6对手斗攻，对住同城劲敌更加唔会留手，中位数2.5球入球大值博。

今季行青春路线嘅车仔，虽然季初发挥未如理想，交咗唔少学费，好彩主帅林柏特并冇因此动摇，畀足一班小将机会发挥自己，令佢哋成为带领车仔联赛回勇嘅主人翁。车仔近7场联赛只係以1比2输过畀「1哥」利物浦，更乘联赛5连胜之势升上积分榜第4位。周中欧联对阿积士，仲喺一度落后1比4嘅劣势下，连追3球逼和对手4比4，尽显顽强斗心。

车仔阵中最抢镜嘅肯定係箭头人物谭美阿巴谦，呢位22岁前锋联赛至今已有9球进帐。「美国队长」基斯甸普列锡近期亦迅速上位，近2场联赛个人斩获4球，一班前场攻击手弗到漏油，令车路士暂以25球成为联赛入波第3多球队。只可惜后防甩漏情况仍未见改善，计埋周中欧联失4球，近4场联赛都只有1场保持清白身，相信呢仗主场出击，车仔都会继续以攻代守。

客军遇Big 6例驳火

水晶宫暂以11战得15分排第9，战绩绝对唔失礼，尤其水晶宫不嬲遇强愈强，作客Big 6球队屡有佳作，包括上季以3比2击败最终王者曼城，今季面对曼联同阿仙奴亦取得1胜1和，总计近7次联赛作客与Big 6交锋获3胜1和3负，其中6次开3球或以上，呢次作客史丹福桥绝对不落下风，中位数2.5球入球大值得捧场。